नेपाली टेलिभिजन : अभ्यास, अनुभूति र विश्लेषण

नेपाली टेलिभिजन प्रसारणको अभ्यासले 25 वर्ष पूरा गर्दैछ । नेपालमा टेलिभिजन प्रसारणमा दस च्यानल देखा परिसकेका छन् । तर तिनका अभ्यास, प्रकृति, अन्तर्वस्तु, इत्यादि पक्षबारे यथेष्ट बहस हुन सकेको छैन । यसै सन्दर्भलाई ध्यानमा राखी यो पुस्तक– नेपालीटेलिभिजन : अभ्यास, अनुभूतिरविश्लेषण तयार पारिएको हो ।

यस पुस्तकले नेपालमा अभ्यासरत टेलिभिजनका विविध आयामलाई खोतलेको छ । अधिकांश लेख टेलिभिजनमा सक्रिय र अनुभवी व्यक्तिले लेखेका हुन् । तसर्थ अनुसन्धान र अनुभवको मिश्रणले लेखहरूलाई खँदिलो बनाएको छ ।

यसमा इतिहास, समाचार, टेलिफिल्म, वृत्तचित्र र समावेशीकरण गरी जम्मा पाँच मुख्य खण्ड छन् । तिनमा नेपाली टेलिभिजनको इतिहास, कार्यक्रमको विकासक्रम, टेलिभिजन समाचार, टेलिफिल्म, टेलिभिजन वृत्तचित्र, भाषाभाषीका कार्यक्रम र टेलिभिजनमा दलितबारे विवेचना गरिएका लेख छन् । टेलिभिजन संस्कृतिसम्बन्धी परिचय र नेपाली टेलिभिजनबारे सन्दर्भ सामग्री पनि यहाँ छ ।

दीपा गौतम २०४३ सालमा उद्घोषकको रूपमा नेपाल टेलिभिजनमा प्रवेश गरेकी हुन् र सोही संस्थामा प्रमुख निर्माताको रूपमा कार्यरत छिन् । काँचको पर्दाः नेपाली टेलिभिजनमा महिला (२०६३) की लेखक गौतमको सह-लेखनमा सञ्चारकर्मी महिलाको अवस्था (२०६२) पनि प्रकाशित छ ।
 
शेखर पराजुली मार्टिन चौतारीका मिडिया अनुसन्धानकर्ता हुन् । उनको सह-सम्पादनमा नेपाली मिडियाबारे छ ओटा पुस्तक प्रकाशित छन् । मिडियासम्बन्धी वाषिर्क जर्नल मिडिया अध्ययनका सम्पादक पराजुलीको पछिल्लो पुस्तक मिडिया संवादः नेपाली पत्रकारिताबारे अन्तर्वार्ता (२०६४) हो ।